د مزارشریف ښاروالۍ اداري غونډه
د مزارشریف ښاروالۍ اداري ناسته د مزارشریف ښاروال الحاج مولوي نقیب الله طارق په مشرۍ په داسې حال کې چې د مرکزي شعبو مسولینو او د دولسګونو ناحیو آمرینو شتون درلود ترسره شوه.
د مزارشریف ښاروال الحاج مولوي نقیب الله طارق د غونډې ګډونوالو ته د ښه راغلاست تر څنګ وویل چې ټول کارمندان مکلف دي څو خپلې دندې د اصولو سره سم ترسره کړي.
نوموړي زیاته کړه چې صفایي او موقته کرایه باید په خپل وخت سره ټوله شي.
د مزارشریف ښاروال ټینګار وکړ چې د دولسګونو ناحیو مسولین باید له ښار څخه د کثافاتو د انتقال پروسه چټکه کړي چې په خبره یې د ټولو کارکونکو تر منځ باید بشپړه همغږي موجوده وي.
د غونډې په بله برخه کې آمرینو او د مرکزي شعبو کارکونکو خپلې ستونزې او غوښتنې د مزارشریف ښاروال ته وړاندې کړې چې د نوموړي لخوا ورته د قناعت وړ ځوابونه ورکړل شول.
ناسته د خیر په دعا سره پای ته ورسیده.
